قازىرگى ورنىڭىز:ءسوز ونەرى » تولىق مازمۇن

اقىندىق تۋرالى ەسەنعالي راۋشانوۆتىڭ ايتقاندارى

قوسىلعان ۋاقىت:2017-02-02رەداكتور:جۇمىكەنقاينارى:جۇڭگو قازاق باسپا ءسوز سايتىكورىلىمى:ىزدەلۋدە...

اقىندىق، ولەڭ دەگەننىڭ ءوزى – سونداي پاكيزا، تازا دۇنيە. وعان اقشا ارالاسسا قۇريدى.

***
ءبىراز ەسەسى كەتكەن، ۇتىلىڭقىراعان، باسشىلارى وتىرىك ايتاتىن، ەل بيلەگەن ادامدارىنىڭ ادالدىقتان گورى، ارامدىعى باسىم جەرلەردەن بولاشاق جاقسى ادەبيەتشىلەر كوپ شىعادى.

***
بۇگىنگى مەگاپوليستەردەن ەلدىڭ قامىن ويلايتىن، ۇلتتىق داستۇرلەردى بىلەتىن ۇلت اقىندارى شىعادى دەپ ويلامايمىن. اقىندىقتى ۇلتتىڭ ار-نامىسى، ۇلتتىڭ ۇياتى دەپ بىلەتىن بولساق، ول نەگىزىنەن سول اۋىلدىق جەرلەردەن شىعادى.

***
ەسكى مەن جاڭا استە بىرىكپەي جاتاتىن بولۋى كەرەك. ۇيلەسىپ كەتكەن نارسەنى كورە الماي كەلەمىن. اقىندىق دەگەننىڭ ءوزى سول ۇيلەسىمدىلىكتى ىزدەپ ءوتۋ شىعار.

***
جاڭاشىلدىق دەگەندى ءبىز تەحنيكالىق، ولەڭنىڭ سىرتقى فورماسىنداعى ىزدەنۋ دەپ قارايتىن بولساق، ول تۋرالى اڭگىمە ەتۋدىڭ ءوزى تۇككە كەرەگى جوق.

***
قاپتاعان، كوز الدىڭنان بىتىراي ۇشىپ جاتقان مىڭ-ميلليونداعان قۇستاردىڭ ىشىندە ءبىر عانا، جالعىز عانا التىن قاناتتىسى بولادى دا، سونى ۇستاپ الساڭ، ولەڭ دەگەن سول. وكىنىشكە وراي، التىن قاناتتى قۇس كەزدەسە بەرمەيدى.

***
ەندىگى جەردە اشىق ايتامىن. جاستاردىڭ اراسىندا حالتۋرشيكتەر كوپ. ارسىزدىق باسىم. كىسى ماقتاۋ، ەسەپپەن ولەڭ ارناۋ سۇمدىق.

***
كوركەمدىك تالاپقا جاۋاپ بەرەتىن دۇنيەلەر از. حالتۋرشيكتەردىڭ، البەتتە، قاي- قايسىسى دا جاقسى ەمەس. ەڭ قيىنى – ايەل حالتۋرشيكتەر. نە دەپ توقتاتۋدى، قالاي قويدىرۋدى بىلمەي دال بولاسىڭ. مىسىق توبەلەسكەن سياقتى. جاقىنداپ ابىروي تاپپايسىڭ. سىرتتان باقىلاپ قانا تۇراسىڭ.

***
كەز كەلگەن اقىن ولسە، بۇگىنگى شەنەۋنىكتەردەن سۇيەگى اۋىر بولادى دەپ ەسەپتەيمىن. ماعان سەنىڭىز، كەز كەلگەن قالامگەر حالىقتى قاراپايىم شەنەۋنىكتەن ارتىق سۇيەدى. كەز كەلگەن اقىن شەنەۋنىكتەن ءبىر كىتاپ بولسا دا ارتىق وقيدى.

***
ينتەللەكتۋالدى پوەزيا دەگەن – پوەزيانىڭ سۇيكىمدىسى ەمەس. ءارى- بەرىدەن سوڭ، ول – سكۋچنايا پوەزيا. ەكىنىڭ ءبىرى وقي المايدى. ءبىراق، ول – پوەزيا!

***
اقىن ءوزىن ۋاعىزداۋى كەرەك. ول ءۇشىن ءوزىن ۋاعىزداۋعا لايىقتى تۇلعا بولۋ كەرەك. ويتكەنى پوەزيانى ادام جاسايدى عوي. اقىندىق – جاراتۋشى الدىنداعى ۇلكەن بورىش!

(ءار جىلعى سۇقباتتان)

评论ىزدەلۋدە......
جوبا تۋرالى | ۋيچات تەكشە | بايلانىس ورناتۋ | ەرەجە - تۇزىم | لەبىز |

توراپتىڭ بارلىق ۇقىعى جۇڭگو قازاق باسپا ءسوز سايتىنا ءتان!

copyright 2018 京ICP备14027709号-2