قازىرگى ورنىڭىز:اڭگىمە » تولىق مازمۇن

ىبىراي التىنسارين:شەشە مەن بالا

قوسىلعان ۋاقىت:2016-12-06رەداكتور:جۇمىكەنقاينارى:جۇڭگو قازاق باسپا ءسوز سايتىكورىلىمى:ىزدەلۋدە...


شەشەسى قىز بالاسىنان سۇرادى:
—بەرگەن اقشامدى قايدا قويدىڭ؟
بالا:
—بىرەۋگە بەردىم.
شەشەسى:
— كىمگە؟
بالا:
—ءبىر تەنتەك بالاعا بەردىم.
شەشەسى:
—مۇنان بىلاي تەنتەك بولما دەپ بەرگەن شىعارسىڭ؟
بالا:
—راس، اجە، ەكىنشى رەت تەنتەك بولما دەدىم. قۇس تا قۇدايدىڭ جاندىگى عوي، اجە؟
شەشەسى:
— ءبىز دە، قۇس تا، بوتەن جانجانۋاردىڭ ءبارى دە قۇدايدىڭ جاراتقان جاندىگىمىز.
بالا:
—ءالگى بالا قۇدايتاعالانىڭ جاراتقان كىشكەنتاي قۇسىن ۇستاپ الىپ، ساتايىن دەپ ءجۇر ەكەن. قۇس كىسى ايارلىق بولىپ، شيقىلداپ تۇردى. سوندا الىپ جۇرگەن بالا تۇمسىعىن قىسا بەرەدى، بەيشارا قۇستىڭ داۋىسىن قۇداي تاعالا ەسىتەدى دەپ قورىققان شىعار دەيمىن.
شەشەسى:
— وندا سەن نەعىلدىڭ؟
بالا:
—مەن بالاعا اقشا بەرىپ ساتىپ الىپ، قۇستى ۇشىرىپ قويا بەردىم. مەنىڭ بۇل ءىسىم ساۋاپ ەمەس پە؟
شەشەسى:
— ارينە، ساۋاپ، بەيشارالارعا قايىرىمدى بولعانىڭ.
بالا:
— ول بالا، كىم بىلەدى، كەمتارلىقتان قۇستى ساتۋعا جۇرگەن اۋ؟
شەشەسى:
— مەن دە سولاي ويلايمىن.
سوندا سويلەپ وتىرعان بالا سىڭلىسىنە قاراپ:
— مانا اقشامنىڭ ءبارىن بەرگەنىم جاقسى بولعان ەكەن، — دەدى.
ءسىڭلىسى شەشەسىنە قاراپ:
— اپاممەن ەكەۋمىز مانا باستەسىپ ەدىك، ول بالاعا اپام قۇسىڭنىڭ ءباسى نە دەپ تە سۇراماي، اقشاسىنىڭ بارىن
بەردى. مەن ايتتىم: قۇستىڭ ءباسى نە؟ — دەپ سۇراۋ كەرەك ەدى دەپ، قايسىمىزدىكى دۇرىس؟
شەشەسى ۇلكەن قىزىنا قاراپ ايتتى:
— سەنىڭ دە بۇل ىستەگەن ءىسىڭدى دۇرىس دەمەيمىن. ەگەر تاعى ءبىر ماناعىنداي بالا جولىقسا، اقشاڭنىڭ بارىن
ءباستاپقى بالاعا بەرىپ قويدىڭ، سوڭعىعا نە بەرەر ەدىڭ؟
ۇلكەن قىزى:
— وندا مەن تاعى دا ساعان كەلەر ەدىم.
شەشەسى:
—ەگەر مەندە دە مال، اقشا بولماسا قايتەر ەدىڭ؟
بالا:
— وندا.. .  دەپ، نە دەرىن بىلە المادى.
شەشەسى:
—كوبىرەك جاقسىلىق ەتۋگە شامام كەلسىن دەسەڭ، ءار نارسەگە كۇتىمدى بولۋ كەرەك. قۇستىڭ ءباسىن سۇراپ، كەمگە بەرمەيمىن دەسە، سوندا اقشاڭنىڭ ءبارىن بەرۋ كەرەك ەدى. ول قۇستىڭ ءوزى نە قۇس ەكەن؟
بالاسى:
— مەن سۇراعانىم دا جوق، اجە، ءوزىڭ ايتۋشى ەمەس پە ەڭ، جاقسىلىق ەتكەن جانىڭنىڭ اتىن دا سۇراما دەپ.
شەشەسى كۇلىپ:
— سولاي، سولاي، شىراعىم، — دەدى.
بالاسى:
— اجە، سەن كورسەڭ ەدى، قۇستى قويا بەرگەنىمدە، اۋەلى قۋانعاننان ءتىپتى ۇشا المادى. سونان سوڭ قۇستى ساتقان بالادان ۋادە الدىم، ەكىنشى رەت ۇستاما دەپ.
شەشەسى:
— قىزىم، جاقسى ءىس ىستەپسىڭ، مىنەكەي ساعان تاعى دا تەڭگە.
قىزى:
— اللا رازى بولسىن، اجە.
شەشەسى:
— شىراعىم، قىزىم، ءاردايىم وسىنداي راقىمدى بول، ساعان مۇنىڭ ءۇشىن قۇداي راقىم ەتەر، — دەدى.


评论ىزدەلۋدە......
جوبا تۋرالى | ۋيچات تەكشە | بايلانىس ورناتۋ | ەرەجە - تۇزىم | لەبىز |

توراپتىڭ بارلىق ۇقىعى جۇڭگو قازاق باسپا ءسوز سايتىنا ءتان!

copyright 2018 京ICP备14027709号-2