قازىرگى ورنىڭىز:باتالار جيناعى » تولىق مازمۇن

قازاقتىڭ باتالار

قوسىلعان ۋاقىت:2015-04-12رەداكتور:جۇمىكەنقاينارى:جۇڭگو قازاق باسپا ءسوز سايتىكورىلىمى:ىزدەلۋدە...


كۇمىس توي باتاسى

قۇتتى بولسىن كۇمىس توي،
توي دەگەنىڭ ىرىس قوي.
التىن جامبى بەرسەم دە،
ەكەۋىڭە دۇرىس قوي.
كۇمىس تويدىڭ اياعى،
التىن تويعا جالعاسسىن.
جارىلقاسىن جاندارىڭ
جۇزىندەي اق الماستىڭ.
تاسي بەرسىن داۋلەتىڭ،
جاراسىپ سان-ساۋلەتىڭ.
قارا قاۋىم ەل بولىپ،
ءوسىپ-ءونسىن اۋلەتىڭ.
سىيلى بولىپ باستارىڭ،
اجاراماي جۇپتارىڭ،
جۇزگە جەتسىن جاستارىڭ.
اۋمين.

التىن توي باتاسى

التىن تويدىڭ داستارقانى،
داستارقانى مول بولسىن.
بەرەكەلى قول بولسىن،
تويعا كەلگەن قوناقتىڭ.
بارىنە ءساتتى جول بولسىن.
تىلەكتەرىڭ وڭ بولسىن،
جۇقارمايتىن قوڭ بولسىن.
ەكەۋىڭنىڭ كيگەنىڭ،
التىن جاعالى تون بولسىن.

نەمەرەڭدى ءوسىرىپ،
شوبەرەڭدى جەتەكتەپ،
شاشقان اللا ىرزىعىڭ،
تەرە بەرگىن ەتەكتەپ،
قۇت بولىپ، مەكەن تۇراعىڭ،
جايقالا بەرسىن قۇراعىڭ،
لايلانباسىن بۇلاعىڭ.
جارقىراي بەرسىن شىراعىڭ،
جاستارىڭ جۇزگە جەتكەنشە
تارقاماسىن ءبىر-بىرىڭە قۇمارىڭ.
اۋمين.

***

قابىل عىپ اللا تىلەكتى،
قۋانتا بەرسىن جۇرەكتى.
«التىن تويىم بولعاي» دەپ،
تىلەۋمەن قانشا كۇن ءوتتى.
تىلەكتى اللا بەرگەنى،
تويىڭ ءوتىپ دۇبىرلەپ،
وسىنشا جاننىڭ كەلگەنى.
باقىتتى جاندار بولىڭدار،
مەرەيى بيىك ەلدەگى،
قۇداي قولداسىن،
جاماندىق ەشبىر بولماسىن.
داۋلەتىڭ تاسىپ بۇدان دا،
تەپسەڭ كەتپەس باسىڭا،
باياندى باقىت ورناسىن.
ۇزاق بولىپ جاستارىڭ،
قىزىعىن كورىپ بالالاردىڭ،
اشىق بولسىن اسپانىڭ.
اۋمين.

ساپارعا باتا

كوشتەرىڭ كولىكتى بولسىن،
جولدارىڭ كورىكتى بولسىن،
قونىستارىڭ قۇتتى بولسىن،
بوساعاسى مىقتى بولسىن،
اۋرۋ-سىرقاۋدان امان بولىڭدار.
باستارىڭا ايىرىلماس باق قونسىن،
مەيىرباندى اللا سەندەرگە جاق بولسىن!
اۋمين.
***

وڭ بولسىن، بالام، ساپارىڭ،
مولىقسىن دامىڭ، تاتارىڭ،
تۋعان ەلىڭ تاپسىرعان،
پارىزىن وتە وتاننىڭ.
بارىپ كەلىپ جاتىر عوي،
وزىڭدەي جاستار – قاتارىڭ.
حالىقتىڭ سۇيگەن تىرەگى،
سوم تەمىردەي بىلەكتى،
ارىستانداي جۇرەكتى،
اناڭنىڭ سۇتىن اقتاي بىل،
بەرە گور دەپ تىلەكتى!
اۋمين.
***

جولىڭدى اللا قولداسىن،
جامانشىلىق بولماسىن.
سەرتى مەن سوزدە تۇراتىن،
سەنىمدى بولسىن جولداسىڭ.
جولىڭدى كەسەم دەگەندەر
ەشقاشاندا وڭباسىن.
ساتتى بولىپ ىستەرىڭ،
جاقسى بولسىن تۇستەرىڭ،
جورتىپ بىر جورتىپ جەتكەندە،
جومارت بولىپ توسەگىڭ.
جۇعىمدى بولسىن ىشكەنىڭ
كورمەگەن جەردى كورىپ قايت،
قايرىلىپ سالەم بەرىپ قايت.
ىرزىعىڭ سىرتتا شاشىلسا،
ونى دا تۇگەل تەرىپ قايت.
ايدارىڭنان جەل ەسىپ،
جەلىپ بارىپ، جەلىپ قايت.
باق قوسىلىپ باسىڭا،
داق تۇسپەي ار مەن باعىڭا،
ساۋ-سالامات وزىڭمەن
كەزدەسەيىك تاعى دا.
اۋمين.

***
ورالۋىڭ تەز بولسىن،
قاسقا جولدىڭ بويىندا.
قىدىر بابام كەز بولسىن،
وزىڭ جايلى جات ەلدە.
جىلى-جىلى سوز بولسىن.
كورە الماعان دۇشپاننىڭ،
ەكى كوزى بەز بولسىن.
كەسىلمەسىن تۇلپارىڭنىڭ تۇياعى،
قايىرىلماسىن سۇڭقارىڭنىڭ قياعى،
بارعان جەردە قۇشاق جايا قارسى السىن،
جاقسى ادامدار، جايساڭ جاندار زيالى.
جالپاق ەمەس:
جاقسى جەرمەن تانىسقىن،
اللا جەبەپ ۇشقان قۇسپەن جارىسقىن.
كوڭىلىڭ شات، ات-كولىگىڭ ارىماي،
وت باسىڭمەن امان-ەسەن تابىسقىن.
اۋمين.
***

باقىتتى بول، قاراعىم،
قارا كوزىم مارالىم.
التىننان بولسىن تاراعىڭ،
كۇمىستەن بولسىن جاراعىڭ.
قۋانىش، كۇلكىڭ تىيىلماي،
جارقىراي بەرسىن قاباعىڭ.
ماقتانىشى بولا بىل،
اتا مەنەن اناڭنىڭ.
تىلەگىڭە جەتە بەر،
وڭىڭنان ەسىپ سامالىڭ.
اۋمين.
***

بەس قارۋىڭ سايلى بولسىن،
جورتقان جولىڭ جايلى بولسىن.
كۇنىڭ شىعىپ، جارقىراپ،
تۇنىڭ تىنىش، ايلى بولسىن،
ىشكەنىڭ زامزام سۋى بوپ،
ۇرتىڭ تولى مايلى بولسىن،
بىر اللا وزى جەبەسىن.
عايىپ ەرەن، قىرىق شىلتەن،
تيگىزسىن دايىم سەبەسىن.
نۇح پايعامبار الدىڭنان،
تەڭىزدە توسسىن كەمەسىن.
التىن كۇندە التى ايلىق،
ارىماي-تالماي جول العىن،
امان-ەسەن ورالعىن،
قازىرگىدەي قول العىن.
اۋمين.

كوپشىلىككە ارنالعان باتالار

جارىلقا، اللا، قابىل ەت،
جارىلقاۋدىڭ قامىن ەت!
ىزەت ابىروي، باق، داۋلەت،
قىزىر قاراپ، باق قونىپ،
نە تىلەسەڭ،
سونىڭ بارىن قابىل ەت!
اۋمين.
***

كۇنىڭ شۋاقتى بولسىن،
كولىڭ سۋاتتى بولسىن!
قونىسىڭ ورىستى بولسىن،
ەككەنىڭ جەمىستى،
ەڭبەگىڭ كەيىستى بولسىن!
جۇلدىزىڭ اعاڭدا بولسىن،
قۇندىزىڭ جاعاڭدا بولسىن!
جارىڭ جىبەكتەي بولسىن!
ارىڭ تۇلەكتەي بولسىن!
ونەرىڭ ورلەي بەرسىن،
ومىرىڭ تورلەي بەرسىن!
اۋمين.

***

جاس بالانىڭ كۇلكىسىن بەر،
جاس انانىڭ ۇيقىسىن بەر.
جومارتتىڭ قولىن بەر،
جورتقىشتىڭ جولىن بەر!
قىزدىڭ قىلىعىن بەر،
سۋدىڭ تۇنىعىن بەر،
اساۋدىڭ ارىنىن بەر،
تۇنگى وتتىڭ جارىعىن بەر.
اسقار تاۋدىڭ پاڭدىعىن بەر،
بۇلبۇل قۇستىڭ تاڭعى ۇنىن بەر.
دالانىڭ جازىقتىعىن بەر،
گۇلدىڭ نازىكتىگىن بەر!
قىراننىڭ كورەگەندىگىن بەر.
ەردىڭ كوڭىلىن بەر،
بۇركىتتىڭ ولىمىن بەر!
لاشىننىڭ جۇرەگىن بەر!
ناعىز دوستىڭ تىلەگىن بەر!
ماڭگى-باقي اجىراماس
شىن عاشىقتىڭ بىلەگىن بەر!
اۋمين.

***

دالاقتاتار داۋدان ساقتا،
جالاقتاعان جاۋدان ساقتا!
اشىققان بورىدەن ساقتا!
اشىنعان ۇرىدان ساقتا!
قارا جەردىڭ كورىنەن ساقتا!
داۋىلدىڭ كارىنەن ساقتا!
جىلاننىڭ زارىنەن ساقتا!
اياق استىنان كەزىگەر -
بالە-جالانىڭ بارىنەن ساقتا!
اۋمين.

***

ۋا، جاراتقان، جارىلقا،
باق-داۋلەتىن اۋماس قىل!
جارىلقاعانمەن جالعاس قىل:
الا اۋىزدى الماس قىل،
قورعانعاننان قالىس قىل!
نيەتتەرى اق بولسىن،
بەينەتتەرى پاك بولسىن،
مۇراتتارىن اسىل قىل!
قولقاسىن شاڭ قاپپاسىن،
جۇرگەن جەرىن جاسىل قىل!
اۋمين.

***

بىر اللا پاناسىن بەرسىن،
پاناسىن بەرسە، بالاسىن بەرسىن.
بالاسىن بەرسە، داناسىن بەرسىن.
ونى قيماسا، قاراسىن بەرسىن.
بىر قۇداي بار قىلسىن؛
مالى جوقتى باي قىلسىن،
تورت تۇلىگىن ساي قىلسىن:
وڭىن – كۇن، سولىن – اي قىلسىن،
عايىپ ەرەن، قىرىق شىلتەن؛
ەكى دۇنيەدە شاپاعات ەتسىن،
وسى تىلەگىم اللاعا جەتسىن!
اۋمين.

***

بىر قۇدايىم وڭداسىن!
وڭ جولىنا باستاسىن!
ۇيىڭدى تۇرلى اپاتتان،
قۇسا-قايعىدان ساقتاسىن،
ۇمىت ارتقان ۇل-قىزىڭ،
ەل سەنىمىن اقتاسىن!
اۋمين.

***

باقىتىڭ داۋلەتىڭمەن تاسا بەرسىن،
دۇشپانىڭ قىردان ۇركىپ قاشا بەرسىن.
باتا سول بىزدەن سىزگە، راحمەت جاۋىپ،
قۇدايىم ماڭدايىڭدى اشا بەرسىن.
اۋمين.

***

عايبات سوزدەن ساقتا،
مەزگىلسىز ولىمنەن ساقتا،
كەۋدەمسوق كەلىننەن ساقتا
تاتىمسىز تۇزدان ساقتا،
ارسىز قىزدان ساقتا.
قايىرىمسىز زوردان ساقتا
جاڭبىرسىز جازدان ساقتا
عۇمىر بەرسەڭ، جايلى بەر،
داۋلەت بەرسەڭ قايىرلى بەر،
ايەلدى سۇيىكتى عىپ بەر،
قىز بەرسەڭ قىلىقتى عىپ بەر.
كەلىننىڭ كەلىستىسىن بەر،
ات بەرسەڭ جەلىستىسىن بەر.
تىرىمىزگە تالاپ بەر،
ولىمىزگە جۇماق بەر.
وسى تىلەگىمدى بولمەي-جارماي
ۇيىپ توگىپ بىر-اق بەر!
اۋمين.

***

جاڭبىرسىز جازدان ساقتا،
جاپا شەككەن ازدان ساقتا.
قاسيەتسىز كەكتەن ساقتا.
كەگىن قۋعان كوپتەن ساقتا.
بۇلتتىڭ الاسىنان ساقتا،
جاۋدىڭ جالاسىنان ساقتا.
ەلدىڭ بالەسىنەن ساقتا
دوس بولىپ، قاس بولعاننان ساقتا،
كۇلە كىرىپ كۇڭىرەنگەننەن ساقتا.
بەرەكە دۋا اسىڭنان كەتپەسىن.
باقىت، داۋلەت باسىڭنان كەتپەسىن.
قىدىر قاسىڭنان كەتپەسىن.
جورتقاندا جولىڭ بولسىن!
جولداسىڭ قىدىر بولسىن!
اۋمين.

***

يا، تاڭىرىم، جارىلقا،
جارىلقاعاننىڭ ىشىندە ەت.
تۇگەل پالەدەن امان ەت،
ساقتاعايسىڭ سالەمەت.
كەشكى تىلەۋىن زارىقتىرما.
اۋزى قاندى بورىدەن ساقتا،
قولى قاندى ۇرىڭنان ساقتا.
كۇلە كىرىپ، كۇڭىرەنە شىققاننان ساقتا،
توردە وتىرىپ مەكىرەنگەننەن ساقتا.
باسىڭا باقىت بەرىپ،
بۇل دۇنيەدە جيعانىڭ بولسىن.
ول دۇنيەدە يمانىڭ بولسىن.
اۋمين.

***

اۋەلى اللا وڭداسىن،
پايعامبار بولسىن جولداسىڭ،
وتكەندەردى ويلاسام
سىرتىڭنان عايبات ايتقان جان،
تاپ وزىڭدەي بولماسىن.
ريزىعىڭ، داۋلەتىڭ قولىڭنان كەتپەسىن،
يمانىڭ جەرگە جەتپەسىن.
قايىرلى عىپ داۋلەت بەرسىن،
ومىرلى عىپ پەرزەنت بەرسىن.
انام دەپ ەسىنە العان جاندى
ەكى جالعاندا قورعاۋشى بوپ،
پايعامبار قاسىنا السىن.
اۋمين.

***
اۋمين دەسەڭ بىزگە،
بىز باتا بەرەلىك سىزگە!
جاسىڭ جەتسىن جۇزگە،
جەلىڭ كەتسىن جۇزگە،
جەلىڭ كەتسىن قۇلا تۇزگە!
مەن مەن باستى،
يمان مەن جاستى
قابات بەرمەيدى ەكەن دەپ،
تاڭىردەن كۇدەر ۇزبە.
اۋمين.

***

قۇداي پەيىل تارىلتپاسىن،
قۋانىشتان ارىلتپاسىن،
حالقىم ەشبىر قامىقپاسىن،
قاسيەتى شارىقتاسىن.
اۋمين.

***

جاقسىمەن جاناسىپ جۇر،
جارلىعا قاراپ جۇر.
شالقۋدىڭ شاماسىن بىل،
اق-قارانىڭ اراسىن بىل.
اۋمين.

***

داستارقانىڭنان دام كەتپەسىن،
كوڭىلىڭنەن سان كەتپەسىن.
ۇرپاق، ۇلىس امان بولىپ،
ومىرىڭنەن مان كەتپەسىن.
اۋمين.

***

اتاڭنىڭ يىقتىسى بول،
اناڭنىڭ سۇيىكتىسى بول.
حالقىڭا قادىرى اسقان،
مارتەبەسى بيىك كىسى بول.
اۋمين.

***

قۇرداسىڭا – قۋانىش بول،
سىرلاسىڭا – سىنىق بول،
جىلاعانعا جۇبانىش بول،
تۋىسىڭا تۇنىق بول.
تاتۋلىققا – تاماشا بول،
ىقىلاسقا – يىق بول،
انا الدىندا الاسا بول،
ار الدىندا بيىك بول.
اۋمين.

***

اقىلىڭ اسسىن،
ىقىلاسىڭ تاسسىن،
بالاڭ ۇبىرلى بولسىن،
قىزىڭ شۇبىرلى بولسىن،
جاقىنىڭ كوپ بولسىن،
دۇشپانىڭ جوق بولسىن.
جاقسى كەلسىن قاسىڭا،
نۇر جاۋسىن باسىڭا.
كوشىڭ كولىكتى بولسىن،
قونىسىڭ تۇلىكتى بولسىن.
قاتۋلىقتان اۋلاق بول،
تاتۋلىققا جاقىن بول.
داۋرەنىڭ ساندى بولسىن،
عۇمىرىڭ ماندى بولسىن،
تاڭىڭ ازاندى بولسىن،
ۇيىڭ قازاندى بولسىن،
شاڭىراعىڭ شات قۇيىلسىن،
داستارقانىڭا جۇرت جيىلسىن،
اۋمين.

***

تالمايتىن تالاپ بەرسىن،
سامعايتىن قانات بەرسىن.
باياندى باقىت بەرسىن،
ۇزاق عۇمىر، تۇرلاۋلى ۋاقىت بەرسىن.
اۋمين.

***
باق كەلىپ قونىپ باسىڭا
كوڭىلىڭ كولدەي شالقىسىن.
پەيىلىڭە تويعان قوناعىڭ،
ىشپەي-جەمەي بالقىسىن.
اۋمين.

***
اسىن، اسىن، اسىڭا،
باقىت قونسىن باسىڭا!
تاڭ مەزگىلى بولعاندا،
بودەنەدەي جورعالاپ،
قىرعاۋىلداي قورعالاپ،
قىزىر كەلسىن قاسىڭا!
دەنساۋلىعىڭ زور بولسىن،
داستارقانىڭ مول بولسىن!
قايدا بارساڭ الدىڭدا،
جارقىراعان جول بولسىن!
ارماندارىڭ الدىڭنان
ساعان شىعىپ جول بەرسىن!
دۇشپانىڭ ساعان قۇل بولسىن،
ۇيىڭ تولعان ۇل بولسىن!
اۋمين.

***

اۋمين دەسەڭ ماعان،
قۇداي بەرسىن ساعان!
وڭ جاعىڭا قاراساڭ،
التىننان تەرەك ورناسىن!
سول جاعىڭا قاراساڭ،
كۇمىستەن تەرەك ورناسىن!
ەش جاماندىق بولماسىن!
امان بولسىن مال-باسىڭ!
قىزىر بولسىن جولداسىڭ!
داستارقان بايلىعىن بەرسىن،
دەنىڭنىڭ ساۋلىعىن بەرسىن!
اۋمين.

***

باستارىڭا باق بەرسىن،
نە بەرسە دە ناق بەرسىن!
قىردا جۇرگەن قىزىردى
ۇيلەرىڭە اپ كەلسىن!
قارىندارىڭ توق بولسىن،
شۇپىرلەگەن ۇيىڭدە
بالالارىڭ كوپ بولسىن!
اۋمين.

***

جاز كەلىپ كوڭىلىڭ جاي بولسىن،
كورگەنىڭ شاتتىق توي بولسىن!
ابزال دوسىڭ كوپ توي بولسىن!
بەرگەن باتام سول بولسىن!
اۋمين.

***

ابىروي بەر، امان ساقتا،
وتتان، سۋدان ساقتا.
تىلسىز جاۋدان ساقتا
كۇلە كىرىپ
كۇڭىرەنە شىققان دۇشپاننان ساقتا.
جامان ايەلدەن ساقتا،
دوس بولىپ، قاس بولعاننان ساقتا،
ارماننان جينالعان كادەدەن ساقتا.
جەلىككەن جەڭگەدەن ساقتا،
پالە اكەلەر تەڭگەدەن ساقتا،
قۇداي قولداسىن،
باسىڭا باقىت ورناسىن.
اۋمين.

***

ازامات تۋى ار بولار،
ادىلدىك سوعان نار بولار.
جادىڭا تۇتساڭ وسىنى -
جاقسىلىق ساعان جار بولار.
دوسىڭا قۇشاق جايعاننىڭ
قاسىنىڭ جولى تار بولار.
تىلەكتەن قازىنا جيعاننىڭ
وشاعى، ورنى بار بولار.
وشاقتا وتىڭ مازداسىن،
ورنىڭنان ور قازباسىن.
اۋمين.

***

اتانىڭ نالاسىنان ساقتاسىن،
بالانىڭ شالاسىنان ساقتاسىن،
اعايىننىڭ الاسىنان ساقتاسىن،
جامانداردىڭ جالاسىنان ساقتاسىن.
اۋمين.

***

بەرەكەمىز قاشپاسىن،
بەلىمىزدى ەشكىم باسپاسىن،
ادال جان بولىپ استاسىڭ،
ارىڭدى كۇلدەي شاشپاسىن.
باقىت بولسا باستاسىڭ؛
مەيمانىڭ، سىرا، تاسپاسىن.
تىرلىكتە تۇزۋ جول تاپساڭ،
تاڭىرىم بەرەر باسقاسىن.
اۋمين.

***

قۋانىشتىڭ تۇراعى بول،
ۇلان ىستىڭ بۇلاعى بول.
مەرەكەنىڭ قۇراعى بول،
مەيىرىمنىڭ شىراعى بول.
سابىرلىقتىڭ سىڭارى بول،
پاك ۇلگىنىڭ شىنارى بول.
تۋىرلىقتىڭ تۇمارى بول،
تۇلعالى ۇلتتىڭ قۇمارى بول.
اۋمين.

***

باسشىنىڭ نوقايىنان ساقتاسىن،
قوڭسىنىڭ قوقايىنان ساقتاسىن.
قالىپتى بىلمەگەننەن ساقتاسىن،
حالىقتى تىلدەگەننەن ساقتاسىن.
ادەپتى اتتاعاننان ساقتاسىن.
نامىستى تاپتاعاننان ساقتاسىن.
تىلىڭدى كۇرمەگەننەن ساقتاسىن،
دىلىڭدى بىلمەگەننەن ساقتاسىن.
اۋمين.

***

قۇدايدىڭ وزى سويتىپ وڭداسىن!
بەس جۇز ساۋلىق قوزداسىن،
سەكسەن ىنگەن بوتالاپ،
سەگىز كەلىن قومداسىن:
ايداپ كەلگەن جىلقىڭنان،
الپىس ايعىر ازىناسىن:
جيىپ كەلگەن تۇيەڭنەن
جەتپىس ىنگەن بوزداسىن:
وزىڭنەن بايلىق وزباسىن!
اعايىننىڭ جارلىسى
بوتەن جاققا توزباسىن:
جانكۇشىكتىڭ بيەسىن بەرسىن.
جانسۇگىردىڭ تۇيەسىن بەرسىن،
نۇرجاننىڭ ويىن بەرسىن
كىم جاقسى بولسا، سونىڭ ويىن بەرسىن:
سول مالىڭا يە بەرسىن،
ارعى وتكەن اتا-باباڭا تيە بەرسىن.
اۋمين.

***

جۇزگە جەتسىن تۇيەڭىز،
ۇش جۇز بولسىن بيەڭىز.
قولىڭنان كەلگەنشە،
جىعىلعاندى كوتەرىپ،
سۇرىنگەندى سۇيەڭىز.
تارىعىپ كەلگەن ادامعا
بەرمەك وتقا كۇيەمىز
بەرگەندى تىم-اق سۇيەمىز،
جومارتتىق قىلعان جاندارعا،
ار جەرلەردە جار بولسىن
بىر جاساعان يەمىز.
اۋمين.

***

قابىل بولسىن مۇستاجان،
وسى قۇداي جولىڭىز،
مال مەن باسىڭ تەڭ وسىپ،
حالىقتىڭ الدى بولىڭىز!
شالقار كولدەي كوپ بولسىن،
قىمىز بەنەن ايرانىڭ،
ايداعىسىز مالدى بول،
اعايىننىڭ الدى بول،
وتىز ۇلدى وردا بول،
ومانجۇرتتىڭ باسى بول!
اۋمين.

***

بولشىل، بولشىل، بولشىل بول،
بوزتورعايداي تولشىل بول.
ادام تاپپاس سوزدى بول،
ور قويانداي كوزدى بول.
بۇرما تەمىر، سوم التىن
سۋعا سالسا باتپاسىن.
تاڭىر بەرگەن نەسىبەڭ،
تەپكىلەسە كەتپەسىن.
جەلىڭنىڭو شەتى مەن بۇ شەتىنە
وق شىرقاسا جەتپەسىن.
قاستىق قىلعان ادامىڭ،
مۇراتىنا جەتپەسىن.
ايتسا-قارعىس، تيسە-كوز
دارىماسىن، وتپەسىن!
اۋمين.

***

جارىلقا، تاڭىرىم، قابىل ەت.
جارىلقاۋدىڭ قامىن ەت.
باي ەت، مامىر ەت.
باتامدى مۇستاجاپ ەت!
تاڭىردەن نە تىلەسە، سونى ازىر ەت!
بۇعان نازار، سانكەبايدىڭ مالى مەن باسىن بەر،
ۇرپاعىنا حاكىم لۇقپاننىڭ جاسىن بەر!
اۋمين.

***

اۋمين دەسەڭ، مىنە، باتا.
تورىڭدە جورعالاسىن قىدىر اتا.
قايدا جۇرسەڭ جولىڭ بولسىن،
جولداسىڭ قىدىر بولسىن!
قايىرلى عىپ داۋلەت بەرسىن،
ومىرلى عىپ پەرزەنت بەرسىن.
ول كورگەن پەرزەنتىڭە
لۇقپان حاكىمنىڭ جاسىن بەرسىن،
قىدىر بابامنىڭ باسىن بەرسىن.
كورە الماۋشى پەندەڭ بولسا،
قورعاۋشىڭ اللا بولسىن،
نە تىلەگەن تىلەگىڭدى قابىل العاسىن،
قابىلداعانىن ناسىپ الماسىن.
قايدا جۇرسەڭ امان-ەسەن جولىڭ بولسىن.
جول يەسى قامبار-اۋ،
شارشاسام سىزدەي كىم بار-اۋ؟
جول ۇستىنەن باعا جۇر،
ار پالەدەن قاعا جۇر.
اۋمين.

***

ارۋ بولسىن العانىڭ
امان بولسىن مال-جانىڭ.
باسىڭا باس قوسىلسىن.
تويى جاعىپ قالجانىڭ.
اقىلمەن شارۋا باق،
ىستىڭ ويلاپ ار جاعىن.
ماقساتىڭا جەتپەككە
ماڭدايدان توك مارجانىڭ.
سامعاۋىن ال سۇڭقاردىڭ،
جاسىن الماي قارعانىڭ.
قىسىلعانعا قول بەرىپ،
قىسقا جىپتى جالعاعىڭ.
وپىق جەرسىن، بوسقا وتىپ،
وپاسىز بۇل جالعانىڭ.
اۋمين.

تۇساۋ كەسەرگە باتا

ءبىر ءۇيدىڭ بالاسى بولما،
كوپ ءۇيدىڭ ساناسى بول!
ءبىر ءۇيدىڭ ساناسى بول!
ءبىر ەلدىڭ اتاسى بولما،
كوپ قولدىڭ اعاسى بول!
اقتى اق دەپ باعالا،
قارانى قارا دەپ قارالا.
وزەگىڭ تالاسا، وزەن بويىن جاعالا،
باساڭا ىس تۇسسە، كوپشىلىكتى ساعالا!
وزىڭە-وزىڭ كامىل بول!
حالقىڭا ادىل بول!
جاۋىڭا قاتال بول!
دوسىڭا ادال بول!
اۋمين.
***

تۇساۋىڭ كەسىلدى، قۇلاما،
تىزەڭدى جارالاپ جىلاما.
قۇلىنداي قۇلدىراپ جۇگىرشى،
كانىكي وزىڭدى سىنا دا.
سەكىرسەڭ قۇزداردان سۇرىنبە،
شىڭدارعا شىققاندا بۇگىلمە.
بولاتتاي قابىرعاڭ قاتايىپ،
وت ۇشقىن ويناسىن تۇگىندە،
ۇزاق بوپ ينشاللا ومىرىڭ،
تاسىسىن شاتتىقتان كوڭىلىڭ.
جارقىراپ كۇن ساناپ وسە بەر،
جارقىلداپ سەمسەردەي سەنىمنىڭ.
اۋمين.

ۇلكەندەردىڭ جاستارعا بەرەتىن باتالارى

قۇتتى بولسىن بەسىگىڭ،
ارتىق بولىپ نەسىبىڭ.
داستارقانىڭ جايىلىپ،
اشىق بولسىن ەسىگىڭ.
ورە بەرسىن بالالار،
دۇشپاندارىڭ بولماسىن،
كۇنشىلدىكپەن تابالار.
الپامىستاي تاعى دا،
ۇل ارتىنان ۇل تاپقىن.
جارقىراعان شولپانداي،
قىز ارتىنان قىز تاپقىن،
قۋاتتى بولسىن بۇگىنگى،
شىلدەحەنە تويلارىڭ.
تىلەكتەرىڭ قابىل بوپ،
ورىندالسىن ويلارىڭ.
اۋمين.
***

اتىڭ تۇلپار،
قۇسىڭ سۇڭقار بولسىن.
جەلىڭ بيەلى،
كوشىڭ تۇيەلى بولسىن.
ىسىڭ جۇيەلى،
باسىڭ كيەلى بولسىن.
قىزىڭ قياعا،
ۇلىڭ ۇياعا قونسىن.
ساپارىڭ ساتتى،
جەگەنىڭ تاتتى بولسىن.
اۋمين.
***

بىرىنشى – ۇزاق جاستى ومىرلى بول،
ەكىنشى – ادال كاسىپكە بەيىمدى بول.
ۇشىنشى – تىل مەن كوزدەن امان بول.
عىلىمعا ونەرمەنەن زەيىندى بول.
تورتىنشى – قاتارىڭدا كەمەلدى بول.
بەسىنشى – بەرەكەلى، بەدەلدى بول.
التىنشى – ارىستانداي ايباتتى بول،
جەتىنشى – جەتەكتەۋشىڭ قىزىر بولىپ،
دىنىنە مۇحاممەدتىڭ قايراتتى بول.
القالى اق وردالى كەڭەستى بول.
دۇعامدى قادىر اللا قابىل ەتسىن،
بۇرىنعى جاقسىلارمەن تەڭەستى بول.
اۋمين.
***

بالالاردىڭ ۇزاق بولسىن ومىر جاسى،
بىرگە وسسىن بىتە قايناپ مال مەن باسى.
قاشاندا تىل مەن كوزدەن امان ساقتاپ،
قاسىندا جۇرسىن ونىڭ پىر پاناسى.
ۇيرەنىپ ونەر-بىلىم ورگە جۇزسىن،
ۇلگى السىن قاتار-قۇربى زامانداسى.
قوندىرىپ وڭ جاعىنا وتاۋلارىن،
قىزىعىن كورسىن ونىڭ اتا-اناسى.
الدىنان شامشىراعى قارسى جانىپ،
گۇلدەنسىن جەر مەن كوكتىڭ ەكى اراسى.
شالىنسىن پەرىشتەنىڭ قۇلاعىنا
بىزدەردەي قاريالاردىڭ اق باتاسى.
اۋمين.

جاس جۇبايلارعا باتا

جاس كەلىننىڭ باتاسى،
جاستاردىڭ كوپ قاتاسى.
جەك كورمەيدى بالاسى،
اناسى مەن اتاسى،
بالالار، كوتەر قولىڭدى،
قايىرلى قۇتتى جولىڭدى،
يەم بەرسىن مال مەن باس.
تولتىرسىن وڭ مەن سولىڭدى.
مەن بەرەيىن باتامدى،
كىشىپەيىل بولىپ، كەلىنجان،
سىيلا ەنەڭ مەن اتاڭدى.

كەكشىل بولما قاراعىم
كەشىرەر اركىم قاتاڭدى.
بولا بەرسىن ويىن-توي،
قىزىقتاپ تويلاۋ – قۇرمەت قوي.
اقىل، ەستەن ايىرىلماي،
جاستارىم، ەسكە الىپ قوي،
قايىرلى بولسىن تويىڭىز،
قۇدالار كەۋدە سوقتىرىپ،
قۇيرىق، باۋىرعا تويىڭىز.
اۋمين.

***

جاس كەلىننىڭ قونعان جەرى،
قۇتتى قونىس تۇعىر بولسىن.
بىرەۋى شال بىرەۋى كەمپىر -
قوس اعارعان عۇمىر بولسىن!
بالاپانمەن، بالاقانمەن
بەسىك ىشى جىبىر بولسىن!
قۇلان-تايدىڭ اسىرىمەن
وتتىڭ باسى دۇبىر بولسىن.
سۇيىسپەندىك ماحابباتپەن
تاتتى كۇلكى، سىبىر بولسىن.
كارى كۇلىپ بالا باعىپ.
مول قىزىقتان ىعىر بولسىن.
كارىلەرگە مەيىرىمدى كەلىندەردە
ادەپ بولسىن.
اتا كۇتۋ، انا باعۋ -
اتا جولى ادەت بولسىن!
اۋمين.

***

قۋانىش قايىرلى بولسىن،
جاستار ابىرويلى بولسىن،
ۋايىمدارى جوق بولسىن،
كوڭىلدەرى توق بولسىن،
ادال ەڭبەك ارقاسىندا،
تابىستارى كوپ بولسىن،
الاقاندارى اشىق بولسىن،
ومىرگە ماشىق بولسىن!
كۇيبەن قاعىپ كەيىن قالماي،
جاڭالىققا عاشىق بولسىن،
ۇرپاقتارى ەر بولسىن،
كەمەڭگەرلەرىمەن تەڭ بولسىن.
ولاردى كورە الماعانداردىڭ:
بەدەل-بەرەكەتى كەم بولسىن!
اۋمين.

***

سەزىمنىڭ پاكتىگىن بەرسىن،
كوڭىلدىڭ اقتىعىن بەرسىن،
جىلۋلى وت باستارىڭا
سابيدىڭ شاتتى ۇنىن بەرسىن!
پەيىلدەرىڭ تارىلماسىن،
شارشاپ-شالدىققاندار
تورلەرىڭدە دامىلداسىن!
كولدەنەڭ كەسەلدەن ساقتاسىن،
كۇڭكىل وسەكتەن ساقتاسىن،
داۋ-جانجالدان ساقتاسىن،
دوستان كوڭىل قالعاننان ساقتاسىن!
شايتاننىڭ ازعىرۋىنان،
ەلدىڭ جازعىرۋىنان ساقتاسىن!
اسىپ-تاسقاننان ساقتاسىن،
وتاۋلارىڭ ەلگە سان بولسىن،
ومىرلەرىڭ بال بولسىن،
بيبى فاتيما انامىزدىڭ
ارۋاعى وزدەرىڭە جار بولسىن!
اۋمين.

***

كەلىنىڭ باياندى بولسىن،
ۇلكەندەردى سىيلايتىن اياۋلى بولسىن!
جىلى جۇزدى بولسىن!
جۇماق سوزدى بولسىن!
كەلىنىڭ باقىتتى بولسىن،
ەل قىدىرسا سىپايى جۇرسىن.
كۇلسە سىپايى كۇلسىن،
اشپىن دەپ جالاڭداماسىن.
وز بايىمنان اناۋ تاۋىر ەكەن دەپ،
شاش قايىرعانعا الاڭداماسىن.
الدىمەن ەرىنە جاقسىن.
قولعا قونعان قىرعيداي
اتاسى مەن اناسىنا جاقسىن.
اۋمين.

ۇزاتقان قىزعا باتا

قۇلىنىم-اۋ قۇلىنىم،
حالقىڭا قالاۋلى بول.
ەلىڭە ەلەۋلى بول.
تاۋداي تالاپ بەرگەنشە.
بارماقتاي باق بەرسىن.
اتا-اناڭ دەگىزبە،
اتا-اناڭا مەيىربان بول.
الدىڭا اي تۋسىن.
ارتىڭنان كۇن تۋسىن!
ۇلكەندەردىڭ الدىنان
كەسە-كولدەنەڭ وتپە.
اتا اتاندىرما،
سۇيەك سىندىرما، قالقام!
اۋمين.
***

ەلىڭە ەلەۋلى بول،
حالقىڭا قالاۋلى بول،
اتا-ەنەڭە جاعىمدى بول،
قايىناعا، قايىنىڭا قايىرىمدى بول.
اۋىلىڭا ايبارلى بول،
كۇيەۋىڭە جايدارلى بول.
اۋمين.
***

قۇلىنىم-اۋ، قۇلىنىم،
حالقىڭا قالاۋلى بول.
ەلىڭە ەلەۋلى بول.
تاۋداي تالاپ بەرگەنشە.
بارماقتاي باق بەرسىن.
اتا-اناڭ دەگىزبە،
اتا-اناڭا مەيىربان بول.
الدىڭنان مەيىربان بول.
الدىڭنان اي تۋسىن.
ارتىڭنان كۇن تۋسىن!
ۇلكەندەردىڭ الدىنان
كەسە-كولدەنەڭ وتپە.
اتا اتاندىرما،
سۇيەك سىندىرما، قالقام!
اۋمين.

ۇل بالاعا باتا

جورتقاندا، بالام، جولىڭ بولسىن،
قالتاڭ دىلداعا تولسىن!
بىر تولماسىن، جىلدا بولسىن،
ومىر-جاسىڭ ۇزاق بولسىن!
قاتارىنان وزعان ەرەن بول،
كول تۇبىندەي تەرەڭ بول!
سىناي قالسا – قۇلاق سال،
ماقتاي قالسا – كەرەڭ بول!
اۋمين.

***

جۇسىپتىڭ ديدارىن بەرسىن،
مۇحامبەتتىڭ يمانىن بەرسىن.
جانىنا دالانىڭ كەڭدىگىن بەرسىن،
ازىرەت اليدىڭ ەرلىگىن بەرسىن،
ابىلايدىڭ بايراعىن بەرسىن،
باۋىرجان باتىردىڭ ايبارىن بەرسىن!
ەلىنە ىرىس-قۇت ورناسىن،
جەرىنە تىنىشتىق ورناسىن!
وسەك-اياڭنىڭ قۇربانى بولماسىن،
وزبىرلاردىڭ شۇلعاۋى بولماسىن!
الىس جولداردا،
قالىڭ ورماندا،
تايعاناق كەلەر قازادان،
جازىقسىز تونگەن جازادان
ءاردايىم اللا ساقتاسىن!
اۋمين.

قىز بالاعا باتا

تالداي بوي بەرسىن،
سۇڭعىل وي بەرسىن،
جازداي جامال بەرسىن،
قارداي جانار بەرسىن!
اناعا شۋاق بولسىن،
اعاعا قۋات بولسىن،
نازىك جانى بولسىن،
ەلىنىڭ ارى بولسىن،
باسىنا ونەردىڭ باعى قونسىن،
اق وردانىڭ شامى بولسىن!
اۋمين.



评论ىزدەلۋدە......
جوبا تۋرالى | ۋيچات تەكشە | بايلانىس ورناتۋ | ەرەجە - تۇزىم | لەبىز |

توراپتىڭ بارلىق ۇقىعى جۇڭگو قازاق باسپا ءسوز سايتىنا ءتان!

copyright 2018 京ICP备14027709号-2