قازىرگى ورنىڭىز:باتالار جيناعى » تولىق مازمۇن

باتالار قامباسى

قوسىلعان ۋاقىت:2015-04-12رەداكتور:جۇمىكەنقاينارى:جۇڭگو قازاق باسپا ءسوز سايتىكورىلىمى:ىزدەلۋدە...


كوتەرەيىك بىلەكتى،
نۇرعا بولەپ جۇرەكتى .
ءبوبەككە باتا بەرەيىك،
اعىنان ايتىپ تىلەكتى .

باسقا اماندىق،
اۋەلى قۇداي باسقا بەرسىن،
باستان كەيىن جاسقا بەرسىن،
جاماندىق ارى بەتتەسىن،
جاقسىلىق باستان كەتپەسىن،
قىدىر اتا قولداسىن،
اللانىڭ ءوزى وڭداسىن،
اميىن ،اللاھۋاكپار !

 

 

ءسابيىمىز سۇيكىمدى بولسىن،
ونەر- ءبىلىمگە يكەمدى بولسىن .
بايتەرەكتەي بويشاڭداپ،
ورەن،ءورشىل،وركەندى بولسىن.
جۇرگەن جولى نۇرعا تولسىن .

جاقسى جولدى تاڭداسىن،
جاماندىقء تالىم الماسىن.
دانالاردىڭ ءداستۇرىن،
جاڭالاسىن،جالعاسىن.
شۇعىلالى، شۋاق كۇن كەشسىن،
باسىن سۇر بۇلت شالماسىن.
قوس توپشىسى تالماسىن،
قىرانداي ءبيىك سامعاسىن.
ارى ادال، جانى جاز،
قۇربىسىنان قالماسىن!

بالالارعا باتا (ۇل) 2
كوزدىڭ  نۇرى بول ،
كوڭىلدىڭ گۇلى بول .
باق قۇشىپ،  بال جۇتىپ ،
حالىقتىڭ ۇلى بول .

بالداي بالا بول ،
نارداي دارا بول .
تاۋداي تالاپتى ،
اسقار وي دانا بول .

ورتاڭدا سىيلى بول ،
جول تابار مىيلى بول .
ادسپاس اقىلدى ،
كوش باستار ءۇندى بول .

بالالارعا باتا (ۇل) 3

ۇرپاعىڭ ونەرلى بولسىن ، ءورىستى بولسىن ،
ءىس– قيمىلى كەلىستى بولسىن .
اتا– بابا ارۋاعى قولداپ ،
ەڭبەكتەرى جەمىستى بولسىن !

جارى جىبەكتەي بولسىن ،
ارى تۇلەكتەي بولسىن .
ونەرى ورلەي بەرسىن ،
جاس باسى تورلەي بەرسىن !

بالالارعا باتا (قىز) 4
ولمەس ونەر بەرسىن ،
ءان-جىر ،ولەڭ بەرسىن .
تەڭدەسىز دارىن بەرسىن ،
ىزگىلىكتىڭ ءبارىن بەرسىن .
تالداي بوي بەرسىن  ،
تاۋداي وي بەرسىن .
جازداي جامال بەرسىن ،
وتتاي جانار بەرسىن .

بالالارعا باتا (قىز) 5
قىزدارىڭ حۇلىقتى بولسىن ،
عالامات بىلىكتى بولسىن .
كۇندەي نۇرلى بولسىن ،
گۇلدەي ءتۇرلى بولسىن .

ولمەس ونەرلى بولسىن ،
ءان– جىر، ولەڭدى بولسىن .
تەڭدەسسىز دارىندى بولسىن ،
ىسكە ەپشىل، سالىمدى بولسىن .

تالداي بويلى بولسىن ،
تاۋداي ويلى بولسىن .
جازداي جامالدى بولسىن ،
وتتاي جانارلى بولسىن !

بالالارعا باتا 6
وميىن دەسەڭ قاراعىم ،
وتتى بولسىن جانارىڭ .
ءسابي كۇننەن ۇعا ءبىل ،
ارمانىن اتا– انانىڭ .
جۇرەگىڭە ساۋلە ورناپ ،
زەردەسى ءبىتسىن دانانىڭ .
ايىڭ تۋىپ الدىڭنان ،
ارشىندى بولسىن قادامىڭ .
جۇلدىزىڭ جانىپ بيىكتەن ،
ەڭ الدى بول بالانىڭ .
باسىڭ امان، دەن ساۋ بوپ ،
ورىندالسىن تالابىڭ .

بالالارعا باتا 7
اۋميىن! دەپ جايساڭ قول ،
ءبىلىمى كوپ بالا بول .
اقىلدى، زەرەك دانا بول ،
ەل– جۇرتىڭا پانا بول .

ايىڭ تۋىپ وڭىڭنان ،
جۇلدىزىڭ تۋسىن سولىڭنان .
ىزگىلىك پەن جاقسىلىق ،
كەزىكسىن ىلعي جولىڭنان .
جاسامپاز بول، تاپقىر بول ،
جول تاباتىن سونىدان .
كوپ جاساۋ ادام ارمانى ،
جاس بەرسىن قۇداي مولىنان .
دەنساۋلىق بەرسىن زور قىلىپ ،
زورلاردىڭ دا زورىنان .
تالاپتىڭ تاۋىن ورلەسەڭ ،
قىزىر تارىتسىن قولىڭنان .

بالالارعا باتا 8
ازامات بولىپ ەر جەتسىن ،
اقساقال بولىپ تورلەتسىن .
سىندارلى بولىپ  كورىكتى ،
عۇمىرى بولسىن بەرىكتى .

ارداگەر بولىپ ارداقتى ،
مىنەزى بولسىن سالماقتى .
سەگىز قىرلى، ءبىر سىرلى ،
ونەرلى بولسىن جان– جاقتى .
وسى ايىتقانىم قابىل بوپ ،
اللا بەرسىن زور باقتى !

بالالارعا باتا 9
تالداي بوي بەرسىن ،
سۇڭعىلا وي بەرسىن .
جازداي جامال بەرسىن ،
قارداي جانار بەرسىن .
اناعا شۋاق بولسىن ،
اعاعا قۋات بولسىن .
نازىك جانى بولسىن ،
ەلىنىڭ ارى بولسىن .
باسىنا ونەردىڭ باعى قونسىن ،
اق وردانىڭ شامى بولسىن .

وقۋعا اتتاناتىن بالاعا باتا 1
ۇلى ارمان جەتەلەپ ،
ۇشتىڭ ۇرپاق ۇيادان .
قىراعى بول، وتكىر بول ،
قيىردى شال قيادان .

تالاپتى بول، ىسكەر بول ،
عىلىمعا قول سوزاتىن .
باسەكە مەن بايگەدە ،
توپ جاراتىن، وزاتىن.

تەكتى اتانىڭ بالاسى ،
جارقىلدايتىن التىن بول .
سيلاسىمدى سىپايى ،
جالىندى بول، جارقىن بول .

كىشپەيىل بول، كىشى بول ،
سالاۋاتتى كىسى بول .
نامىستى بول، ارلى بول ،
تۇستاسىڭنىڭ الدى بول .
ەل دەگەندە ەمىرەنەر ،
ۇجداندى بول، قاندى بول .
بارىنەن دە حابارلى ،
مادەنيەتتى، ءساندى بول .
ەل الدىندا ماڭگى بول .

وقۋعا اتتاناتىن بالاعا باتا 2
ءبىلىم قۋعان جاس ۇرپاق ،
جاقسى سوزدەن تۇڭىلمە .
جارا سالار جانىڭا ،
جاماندىققا ۇڭىلمە .
قيىندىققا جولىقساڭ ،
بور كەمىكتەي ۇگىلمە .
بوسقا وتكىزىپ ۋاقىت ،
ويىن قۋىپ جۇگىرمە .
جىگەرلى بول، ءنارلى بول ،
نامىستى بول، ارلى بول .
اقىلىڭمەن ءالدى بول ،
ساباقتاستارىڭ الدى بول .
زەردەلى بول، زەرلى بول ،
ونەرىڭمەن ءورلى بول .
ءارى زەرەك، ءارى ىسكەر ،
اتاعىڭمەن ءتورلى بول .

وقۋعا اتتاناتىن بالاعا باتا 3
سامعايتىن شاقتا شىراعىم ،
حالقىڭنان باتا سۇرادىڭ .
كەمەيىتبەسىن ءبىر اللا ،
تالابىڭنىڭ  قۇرامىن .
الاقايلاپ قۋاندى ،
حالىق دەگەن قۇنارىڭ .
ويىڭا ساقتا قاي– قاشان ،
سەنىمنەن سەرىت تۋارىن .
سەنىمدى بول وزىڭە ،
العا باسساڭ ءبىر ادىم .
ءۇمىتىڭدى جاندىرسىن ،
بىلىمگە دەگەن قۇمارىڭ .
ءبىلىمدىنىڭ بىلەرسىڭ ،
مىڭ ادامدى جىعارىن .
جۇرەگىڭە جازىلسىن ،
ەرلىك دەگەن ۇرانىڭ .
تالابىڭا نۇر جاۋسىن ،
ەلدىڭ كوتەر سىناعىن .
تولقىنىنا توعىتات ،
ءومىر دەگەن ۇلى اعىن .
تاسقا باسىپ جەتىلدىر ،
تۇلپارىڭنىڭ تۇياعىن .
يىعىڭا تاعايىن ،
ىقىلاستىڭ تۇمارىن .
ونەگەسىن قاستەرلە ،
بەرەكەلى ۇيانىڭ .
اقىل سۇرا بىلگەننەن ،
كەڭەستە بولسىن قۇلاعىڭ .
ۇرپاق جولىن وڭعار دەپ ،
تاڭىردەن مەدەت سۇرادىم .

وقۋعا اتتاناتىن بالاعا باتا 4
كوپكە باسشى كوسەم بول ،
سويلەر سوزگە شەشەن بول .
حاۋىپ پەنەن قاتەردەن ،
قاي– قاشاندا ەسەن بول .

ۇلى سوزگە ۇستا بول ،
قىسىر سوزگە قىسقا بول .
قاجىرلى بول، قايسار بول ،
ۇيدە بولماي تىستا بول .

قول باستارداي باتىر بول ،
مىڭ كىسىگە تاتىر بول .
ەڭبەگىڭدى ەل تانىپ ،
جاقسىلارمەن جاقىن بول .

وقۋ وقىپ عالىم بول ،
جانعان وتتاي جالىن بول .
اتىڭ شىعىپ حالىققا ،
زاتىڭمەنەن ءمالىم بول .

وقۋعا اتتاناتىن بالاعا باتا 5
وميىن دەپ جايساڭ قولىڭدى ،
اللا وڭعارسىن جولىڭدى .
ەل ءۇمىتىن اقتايتىن ،
ازامات بول تولىمدى .

اۋەلى اللا وڭداسىن ،
پەرىشتەلەر قولداسىن .
بولاشاعىڭ نۇرلى بوپ ،
جامانشىلىق بولماسىن .

عىلىممەنەن ءماندى بول ،
ءبىلىممەنەن ءساندى بول .
وت جالىندى ارلى بول ،
تۇستاسىڭنىڭ الدى بول .

باقىت قونسىن باسىڭا ،
قيىندىققا جاسىما .
ءونەر ىزدە تىنباستان ،
الۋعا ءبىلىپ اسىعا .

بولاشاققا ۇران بول ،
ەل– جۇرتىڭا تۇمار بول .
اق يىقتاي قىران بول ،
كوپ جاستىعا سىڭار بول .

وقۋعا اتتاناتىن بالاعا باتا 6
ءومىر دەگەن ارنادان ،
ءبىزدى ىلگەرى جالعاعان .
قيانعا سامعار قىران بول ،
قاناتىڭ بولسىن تالماعان .
بىزدەر جەتىپ بارماعان ،
بىزدەر تاۋىپ الماعان .
قيىنىنا قىرىمنىڭ ،
بيىگىندە عىلىمنىڭ ،
وردەن ورگە وتەر بول ،
ورشەلەنە جەتەر بول .
جۇلدىزىڭ جانسىن وڭىڭنان ،
باق دارىسىن جولىڭنان .
مارتەبە بەرسىن زورىنان ،
بيلىق بەرسىن مولىنان .
باستالعان وسى جول باسىن ،
جاراتۋشى وڭداسىن .
الدىڭدى اشىق جارىق قىپ ،
دارىسىن دارقان الىپتىق .
ۇزاق بولسىن ءومىرىڭ ،
وسكەلەڭ بولسىن كوڭىلىڭ .
باسىڭا باق ورناسىن ،
قىدىر اۋليە قولداسىن .

وقۋعا اتتاناتىن بالاعا باتا 7
قولىڭدى جايىپ،  شىراعىم ،
ۇلكەننەن باتا سۇرادىڭ .
قاسيەتىن قاستەرلە ،
اق باتاداي مۇرانىڭ .
سۋسىنىڭدى قاندىرسىن ،
بىلىمگە دەگەن قۇمارىڭ .
ءبىلىمدىنىڭ بىلەرسىڭ ،
مىڭدى جالعىز جىعارىن .
ءبىلىم ىزدەپ قينالساڭ ،
تاۋسىلماسىن شىدامىڭ .

جانعان وتتاي جالىن بول ،
وقۋ وقىپ عالىم بول .
كوكەيىڭە كوپ توقىپ ،
ونەرىڭمەن ءمالىم بول .

تويعا باتا 1
جاراتۋشىڭ جار بولسىن،
شۇعىلالى تاڭ بولسىن .
تاتۋلىعى جاراسقان،
ءومىرلەرىڭ ءسان بولسىن .
كۇندە قىزىق، دۋمان – توي،
ۇيلەرىڭدە ءان بولسىن .
دوس پەن تۋىس كوپ بولسىن،
دۇشپاندارىڭ جوق بولسىن .
زاماندارىڭ شات بولسىن:
داستارحانىڭ توق بولسىن .
ماحاببات- سەزىم- ءومىرلىك،
سۋىمايتىن شوق بولسىن.
ۇلدارىڭ ءوسىپ، باي بولسىن،
قۇلىنىڭ ءوسىپ تاي بولسىن .
قىزدارىڭ ءوسىپ قىلىقتى؛
جۇلدىز بولسىن، اي بولسىن .
توق ەتەرىن ايتقاندا،
باق– داۋلەتىڭ ساي بولسىن.



评论ىزدەلۋدە......
جوبا تۋرالى | ۋيچات تەكشە | بايلانىس ورناتۋ | ەرەجە - تۇزىم | لەبىز |

توراپتىڭ بارلىق ۇقىعى جۇڭگو قازاق باسپا ءسوز سايتىنا ءتان!

copyright 2018 京ICP备14027709号-2