قازىرگى ورنىڭىز:باتالار جيناعى » تولىق مازمۇن

بالانىڭ تۇساۋى كەسۋگە ارنالعان باتا

قوسىلعان ۋاقىت:2015-04-12رەداكتور:جۇمىكەنقاينارى:جۇڭگو قازاق باسپا ءسوز سايتىكورىلىمى:ىزدەلۋدە...


بالانىڭ تۇساۋى كەسۋگە ارنالعان باتا

كەسىلدى، بالام، تۇساۋىڭ،
جالتاقتاماي اياق باس.
بيىك بولىپ ۇشارىڭ
اسقارلارمەن قاناتتاس.
قاسىڭ قۇرار ايلا مىڭ —
قاپىلىستا سۋرىنبە.
جالتان قۇشاق جايتاننىڭ
پىشاعىنا ىلىنبە.

باۋىرجان-اتانىڭ باتاسى

اق جۇرەك بولسىن جولداسىڭ،
ادالدىق سەنى قورعاسىن.
جاقسىلىق ءۇشىن كۇرەسسەڭ،
جانىڭدى ارىڭ قورعاسىڭ.
اعىندى بولسىن شابىسىڭ،
الىمدى بولسىن تابىسىڭ،
نايزاداي بولسىن نامىسىڭ،
ەر جىگىتكە ءبارى سىن.
قيىندىق كورسەڭ مۇقالما،
اۋىرلىق كورسەن جۇقارما،
قامقورشى بول كىشىگە،
ۇلكەندى ۇلگى تۇت العا.
ايگىلى بولىپ الەمگە،
كۇندەي بولىپ جارقىرا.
ادالدىق جولمەن ءجۇرداعى،
جاعىمدى بول حالقىڭا.
بايتەرەكتەي ءبۇرلى بول،
بايشەشەكتەي ءبۇرلى بول،
قاجىمايتىن قايراتتى بول،
دۇشپانىڭا ايباتتى بول.
جاس ۇرپاق عۇمىرلى بولسىن،
اتا-اناعا مەيىرلى بولسىن.
قۋانىشتى، كوڭىلدى بولسىن،
ەڭبەگى ءونىمدى بولسىن.
تالابى تاۋعا ورلەسىن،
قاۋىپ-قاتەر تونبەسىن،
حالقىنا سەنىمدى بولسىن
ابرويى بەدەلدى بولسىن.
الۋان ءتۇرلى ونەرى بولسىن،
تابىسى تاۋداي كەنەلى بولسىن.
ءسوزى وتكىر جۇيەلى بولسىن،
حالقىنىڭ جان كۇيەرى بولسىن.
ەلىنىڭ قامقور تىرەگى بولسىن
نە تىلەسە تىلەگى بولسىن.

اركەز ءار جەردە ايتىلاتىن باتالار

ءامين دەسەڭ ماعان،
باتا بەردىم ساعان،
قابىل بولسىن توباڭ،
قولتىعىڭنان دەمەسىن،
قىدىر بابام.
ۋا، ءدام ىشكەندەر تەرلەسىن،
ماڭىڭا دۇشپاندار كەلمەسىن،
ءتاڭىرىم بەرگەن نەسىبەڭ،
كۇننەن كۇنگە ورلەسىن.
تالابىڭدى جۇرگىزىپ،
ءتاڭىرىم ءوزى وڭداسىن.
گۇل-گۇل جاينات،
تايداي وينات.

ازامات تۋى — ار بولار،
ادىلدىك — سوعان ءنار بولار.
جادىڭا تۇتساڭ وسىنى —
جاقسىلىق ساعان جار بولار.
قاسىنىڭ جولى تار بولار،
تىلەكتەن قازىنا جيعاننىڭ —
وشاعى، ورنى بار بولار.
وشاقتا وتىڭ مازداسىن،
ورنىڭنان ور قازباسىن.

ىرگەڭنەن يەكتەپ ءيتىڭدى ەشكىم
شۋلاتپاسىن،
قاسىڭدا وتىرىپ — قالپاعىڭدى
ەشكىم تۋلاتپاسىن.
تورىڭە شىتىپ توسەگىڭدى ەشكىم
تىلمەسىن،
كوزىڭدى شۋڭىپ-كوسەۋىڭدى ەشكىم
ىلمەسىن.
تاتۋ كورشىڭنەن — تاباعىڭدى
ەشكىم بولمەسىن،
قايتى مەڭدەگەن قاباتىڭدى ەشكىم
كورمەسىن.

قارنىڭ تويسا — قالىپتان اسپا،
تايانىش بول تارىققان باسقا.
جار بولىپ ءجۇر جابىققان جاسقا
جاقسى ءىسىڭدى جانىقپاي باستا.

اتاڭا — ار بول
اناڭا — ءنار بول،
جاقسىعا — جال بول،
جامانعا ءزار بول،
حالقىڭنىڭ قۋانىشى بول،
جالپىنىڭ جۋبانىشى بول.

قامىڭدى تەلىپ قارىنعا،
قاراۋلىق جولعا سالىنبا.
شالقىپ ءبىر تۇرعان شاتىڭدا
شاتتىققا ەلتىپ قابىنبا.
جۋرەرسىڭ سوندا بابىڭدا
جۋپتاسار ساعان باعىڭ دا.

كوزىڭدى كىربىڭ ۇيالاماسىن،
ءوزىڭدى كىرجىڭ قيالاماسىن.
كۋلىككە ءتاڭىر الدىرا بەرمەسىن،
كۇدىككە ءسىرا شالدىرا كورمەسىن.
ابەستىككە مالىندىرماسىن،
الەكتىككە جالىندىرماسىن،
قاراۋلىققا قانىڭ بۋرماسىن،
جاقسىلىقتى جانىڭ جىرلاسىن.

باپكەرى جوقتا قىران جەتىم،
باق-تەرى جوقتا ۇلان جەتىم.
بايدان ايىرىلسا — قاتىن جەتىم،
جايدان ايىرىلسا — جاقىن جەتىم،
بالادان ايىرىلسا — انا جەتىم.
سارادان ايىرىلسا — دانا جەتىم.
قاڭسىپ قالسا — قازان جەتىم،
شالىقتانسا — تازاڭ جەتىم.
قۇداي سەنى جەتىمدىككە جازباسىن،
ءتۇتىنىڭ تۋزۋ، وشاقتا وتىڭ مازداسىن.

جاقسىلىققا ات بايلاپ جۋرەيىك،
جاماندىقتى قاقپايلاپ جۇرەيىك.
ارعا تابىنىپ جۇرەيىك،
اعايىندى ساعىنىپ جۇرەيىك.

قۋانىشتىڭ تۇراعى بول،
ۇلان ءىستىڭ بۇلاعى بول،
مەرەكەنىڭ قۇراعى بول،
مەيىرىمنىڭ شىراعى بول،
سابىرلىنىڭ سىڭارى بول،
پاك ۇلگىنىڭ شىنارى بول،
تۋرالىقتىڭ تۇمارى بول،
تۇلعالى ۇلتتىڭ قۇمارى بول.

اتاڭنىڭ يىقتىسى بول،
اناڭنىڭ سۇيىكتىسى بول،
حالقىڭا ءقادىرى اسقان
مارتەبەسى بيىك كىسى بول.

بوساعاڭدى تەپتىرمە،
دوسقا ازار شەكتىرمە،
تابالدىرىعىڭدى تاپتاتپا،
تاسىرلاردى اتتاتپا،
سۇيىقتى تورگە وزدىرما،
سعاناناق قولىن سوزدىرما.
مىنشىلدەن جاسىپ مۇقالما،
كۇنشىلدەن ساسىپ جۇقارما.
شاۋجايدان جارىڭ الماسىن،
شاڭىراعىڭ داتقا قالماسىن،
جاقسىلىق نىقتاپ ىرگەسىن،
جاندارىڭ قايعى بىلمەسىن.

125 جاستاعى ابىزدىڭ شاقشاق ۇلى جانىبەككە بەرگەن باتاسى
— ەڭ اقىرعى باتامدى ەستى، بالام،
ريزا بول اتاڭا، بالام.
باعىڭ جوعارى ەرلەسىن، بالام،
دۇشپانىڭ شەنىڭە كەلمەسىن، بالام،
ابىرويىڭ تايماسىن، بالام،
باسىڭا داۋلەت قۇسى ورناسىن، بالام،
لۇقپانداي ميلى بول، بالام،
رۇستەمدەي باتىر بول قايمىقپاي، بالام
داۋىتتەي ۇلدى بول، بالام،
تالقاداي ءتىلدى بول، بالام،
مۇحامەتتەي كوزدى بول، بالام،
ءادىل تۋرا ءسوزدى بول، بالام، بالام
ومارداي قارا قىلدى قاق جار، بالام
ازىرەت عاليداي توپ جار، بالام،
اعزامداي دانا بول، بالام،
عازاليداي اش-ارىققا پانا بول، بالام،
كەرەگەندەي ءسوزدى بول، بالام،
قۇرالايداي كەرىكتى، ءجۇزدى بول، بالام،
اتىمتايداي جومارت بول، بالام،
قىسىراۋلداي جومارت بول، بالام،
قوبىلاندىداي قايتپاس بول، بالام،
تارعىنداي جاراعا جاتپاس بول، بالام،
الپامىستاي داڭقتى بول، بالام،
قامبارداي حالقىڭا بول، بالام،
پالە-جالا تاپپاسىن، بالام،
وردامىز تۇركىستان، بالام،
مەسەلىڭ قايتپاسىن ۇرىستان، بالام،
تۇركىستاندا تۋگەل باپ، بالام،
سامارقاندا سانسىز باپ، بالام،
ەر باستىعى ەدىگە، بالام،
امان-ساۋ بار ەلىڭە، بالام!



评论ىزدەلۋدە......
جوبا تۋرالى | ۋيچات تەكشە | بايلانىس ورناتۋ | ەرەجە - تۇزىم | لەبىز |

توراپتىڭ بارلىق ۇقىعى جۇڭگو قازاق باسپا ءسوز سايتىنا ءتان!

copyright 2018 京ICP备14027709号-2